A Deputazión de Zaragoza convoca a primera edizión d’o Premio Literario de narrativa e narrativa grafica en aragonés e d’o Premio Literario de poesía en aragonés Santa Isabel d’Aragón, reina de Portugal. Os gualardons son dotatos cadagún con 5.000 euros e a publicazión d’a obra. As personas intresatas tienen de plazo dica o 20 d’agosto pa presentar-ie as suyas propuestas.
As obras abrán d’estar escritas en aragonés, orichinals, ineditas, nunca no pueden aber estato premiatas, quedando escluyitos os testos creatos per medio de ferramientas de IA. Per lo que fa á lo chenero literario, podrán estar narrativa, cómic u narrativa grafica, poesía, teatro u asayo. Cada autor u autora podrá presentar-ie como masimo dos obras distintas. Tendrán dreito a partizipar-ie personas fisicas que aigan feito a mayoría d’edat un año antis d’a publicazión d’a convocatoria en o Boletín Ofizial d’a Provinzia e de cualsequier nazionalidat u residenzia.
“Se trata d’os premios més importans de literatura en aragonés en l’autualidat e que contan con una mayor dotazión economica, con l’obchetivo de contribuyir á fer vistable e fer valer a literatura en aragonés en cualsequiera d’os ambitos literarios”, ha destacato o deputato de Archivos e Bibliotecas d’a Deputazión de Zaragoza, José Manuel Latorre, qui ha resaltato de vez que con iste premio, a Deputazión de Zaragoza ampla o suyo compromís “con a cultura e a luenga aragonesa, que ye patrimonio inmaterial d’o nuestro país e que, per as suyas eszelenzias literarias, tienen un pasato significativo e un presén e un futuro vivos”. “Dende ista instituzión seguiremos amparando e promovendo actuazions pa la ensiñanza, formazión e divulgazión d’a luenga aragonesa”, ha inzidito Latorre.
O plazo de presentazión de solizituz ye de 30 días naturals á contar dende l’atro’l día d’a publicazión d’as bases en o Boletín Ofizial d’a Provinzia de Zaragoza (BOPZ). Se presentará presenzialmén, en o Rechistro de Dentradas d’a Deputazión Provinzial de Zaragoza en orario de 9.00 a 14.00 u de manera telematica per o “Catalogo de trámites” d’a siede electronica d’a DPZ:
https://dpz.sedelectronica.es/catalog/t/fab1fd4c-a819-40dd-8eb3-31b8f008df38
https://dpz.sedelectronica.es/catalog/t/69b185d0-3f5f-4627-86a9-d7fb63bd4bcd
Á la ora de conzeder o premio de poesía, s’avaluará a calidat d’a composizión literaria; a orichinalidat e creyatividat d’a obra; o ritmo e coderenzia poetica; a innovazión conzeutual e lingüistica; e a tecnica literaria y estilo. Por lo que fa a lo premio de narrativa e narrativa grafica, se abrá cuenta d’a calidat, a orichinalidat, e a creyatividat d’a obra; d’o ritmo e coderenzia narrativa; d’a innovazión conzeutual e lingüistica; e d’a tecnica literaria y estilo. E, adizionalmén pa narrativa grafica u cómic, a claridat e orden d’a propuesta; a ilustrazión en relazión con o testo; e a maquetazión (composizión e leyebilidat).
